Om Pfingstsunntoch hot der Vitus unner Chorleiter sein 60zigstn Geburdsdoch gfeierd. Fill leud sän noch Förtschwind nein Feuwerwehrhäusla kumma.

Die Altershäuser Sänger sin middn Bus kumma. Im alten Pfarrhaus vo Zentbechhofn hom die Zentbechhöfer und die Altershäuser Sänger als gmischter Männerchor scho moll a Lied geprobt.

Den Aufdagt in Förtschwind mit die Zentbechhöfer Sänger hot em Vitus sei Schwester Maria (Köller) oostimmd. Unner Vorstand der Manni hod a schööna Red ghaldn und Gschengla überreicht. Der Vitus hot sei Gäsd mit aaner gscheid frängischn Reed begrüsst wo viel glacht worn ist!

Es is vill gessn und drungn worn. Sparglcremsubbn, Schäuferla und Hähnla hots gehm, Kaffe, Kung und a glana Bortzeit aanu! Alles hot wunderbor gschmeggt!

Und die Musik is a net zä kurz kumma. Die Zentbechhöfer hom so 10 Lieder gsunga. Der Vitus hod donn aa widdä selber dirigiern derfn. Und die Altershäuser, wo der Vitus früher moll geliddn hod, hom gsunga wie die Lerchn!

Es wor a schöner dooch. Es häd fei kaaner wos dägeeng wenn der Vitus öfter moll 60 wärerd wenn des gingert! Obber des geht blos a-moll. Miä wünschn unnern Vitus vill Gsundheid und dasser nu long unner Chorleider is!